Neidio i'r prif gynnwys
Wales Safer Communities Logo
Wales Safer Communities Logo Dychwelyd
Hygyrchedd Porth Aelodau

Cyflwyniad i’r Rhwydwaith

Pwy ydym ni

Fe sefydlwyd Rhwydwaith Cymunedau Mwy Diogel Cymru i feithrin cymunedau mwy diogel ar hyd a lled Cymru. Rydym yn cynnig cefnogaeth a chymorth, yn gweithio ar y cyd ac yn galluogi datblygiad proffesiynol parhaus ar gyfer ymarferwyr diogelwch cymunedol.

Ein gweledigaeth yw creu cymunedau mwy diogel, cryfach a mwy gwydn ar hyd a lled Cymru.

 

Ein cenhadaeth yw i gefnogi ymarferwyr, dylanwadu ar bolisi cenedlaethol a hysbysu ymarferwyr i wella darpariaeth leol i sicrhau cymunedau mwy diogel.

Byddwn yn cyflawni’r rhain drwy ein gwerthoedd. I fod yn:

  • Llais cenedlaethol yr ymddiriedir ynddo ar ddiogelwch cymunedol
  • Yn gynhwysol a chydweithredol
  • Yn cael ei arwain gan dystiolaeth
  • Yn agored, ymatebol a rhagweithiol
  • Gan ganolbwyntio ar atal ac ymyrraeth gynnar

 

Beth rydym yn ei wneud

Rydym yn darparu arweiniad, cefnogaeth ac adnoddau cynhwysfawr i ymarferwyr diogelwch cymunedol a gweithwyr proffesiynol eraill. Rydym yn meithrin partneriaethau, hyrwyddo cyfleoedd hyfforddi a hwyluso rhannu gwybodaeth i wella gweithgarwch diogelwch cymunedol ar hyd a lled Cymru.

Rydym yn gweithredu fel llais ymarferwyr diogelwch cymunedol ar hyd a lled Cymru, gan weithredu fel canolwr annibynnol pan fo angen i fynegi eu heriau, llwyddiannau a’u safbwyntiau i wneuthurwyr polisi yn Llywodraethau Cymru a’r DU.

Rydym i gyd yn gwybod fod diogelwch cymunedol ar sawl ffurf ar draws Cymru, yn nhermau materion o flaenoriaeth ac ymagweddau lleol. Rydym hefyd yn gwybod fod y gallu i fynd i’r afael ag achosion a chanlyniadau’r materion hyn yn gofyn am waith partneriaeth cryf. Mae rhannu gwybodaeth, codi ymwybyddiaeth o bwysigrwydd diogelwch cymunedol  yn ogystal â dod â phobl ynghyd yn greiddiol i nod y Rhwydwaith – i greu cymuned o gefnogaeth ar gyfer pawb sy’n ymwneud â diogelwch cymunedol.

Mae ein haelodau’n bartneriaid allweddol sy’n ymwneud â darparu diogelwch cymunedol yng Nghymru, gan gynnwys Llywodraeth Leol, Plismona yng Nghymru, Llywodraeth Cymru, Gwasanaethau Tân ac Achub, Iechyd Cyhoeddus, y Gwasanaeth Prawf, a’r Trydydd Sector. Yn ogystal, rydym yn gweithio’n agos gyda Phartneriaethau Diogelwch Cymunedol lleol. Cymdeithas Llywodraeth Leol Cymru (CLlLC) sy’n cynnal y Rhwydwaith ar hyn o bryd.

 

Cefndir y Rhwydwaith

Fe sefydlwyd y Rhwydwaith yn Ionawr 2021 fel ymateb ar y cyd gan Lywodraeth Cymru, Cymdeithas Llywodraeth Leol Cymru (CLlLC) a’r Heddlu yng Nghymru, yn dilyn cyhoeddi adolygiad Llywodraeth Cymru o waith partneriaeth diogelwch cymunedol yng Nghymru.

Roedd Adolygiad Gweithio Gyda’n Gilydd i greu Cymunedau Mwy Diogel 2017 yn gosod gweledigaeth o ran diogelwch cymunedol yng Nghymru wedi ei yrru gan ymagwedd ar y cyd ac un integredig ac aml-asiantaethol fel bod pob cymuned yn gryf, diogel ac yn hyderus. Seiliwyd y weledigaeth hon ar gyfrifoldeb a rennir gan y llywodraeth, y cyhoedd ac asiantaethau trydydd sector i gydweithio i fynd i’r afael ag ymddygiad niweidiol, gwrthgymdeithasol ac anghyfreithlon.

Rhagwelwyd y byddai:

  • Yn seiliedig ar dystiolaeth ac wedi ei arwain gan wybodaeth
  • Wedi ei gefnogi gan wybodaeth a sgiliau priodol
  • Wedi ei ariannu’n gynaliadwy ac yn addas i’r ardal leol
  • Yn atal ac yn ymyrryd cyn gynted â phosibl
  • Yn canolbwyntio ar welliannau a buddion yn y tymor hir

Cafodd sefydlu Rhwydwaith Cymunedau Mwy Diogel ei argymell fel rhan allweddol o’r ymagwedd hon ac mae wedi esblygu yn rhan bwysig o’r dirwedd partneriaeth yng Nghymru.

Mae Bwrdd Gweithredol Cymunedau Mwy Diogel Cymru yn goruchwylio’r Rhwydwaith ac yn darparu trefn lywodraethu ar y cyd rhwng Llywodraeth Leol, Plismona yng Nghymru a Llywodraeth Cymru. Mae tîm y rhwydwaith yn rhoi mewnbwn i’r Bwrdd, y mae ei nod yw sicrhau arweinyddiaeth a rennir effeithiol sy’n cefnogi gweithio mewn partneriaeth leol ac yn hyrwyddo cymunedau diogel, cryf a hyderus.

Cwrdd â thîm y Rhwydwaith

Mae Mark wedi bod gyda’r Rhwydwaith am dair blynedd, gan ymuno ar secondiad o dîm Comisiynydd yr Heddlu a Throsedd De Cymru, lle roedd yn Gomisiynydd Heddlu a Throsedd Cynorthwyol.

Mae Mark yn cynnig cyfoeth o brofiad o’r sector cyhoeddus a phreifat, ar ôl treulio deng mlynedd yn y diwydiant ceblau a thelathrebu, cyn ymuno gyda Heddlu Gogledd Cymru ugain mlynedd yn ôl. Yn ystod y cyfnod hwnnw, enillodd Mark brofiad yn y meysydd rheoli prosiect, datblygu prosiect a gweithio mewn partneriaeth, gan gynnwys cadeirio Bwrdd Gwasanaethau Cyhoeddus Cwm Taf Morgannwg, Bwrdd Cyfiawnder Troseddol De Cymru, a Chyfarwyddwr FORCardiff.

Mae Mark am ganolbwyntio ar ei ymrwymiad i gefnogi ymarferwyr a phawb sydd yn rhan o ddiogelwch yn y gymuned ar gyfer y Rhwydwaith, er mwyn adeiladu partneriaethau cydweithredol cryf sy’n gwneud gwahaniaeth mawr i gymunedau ledled Cymru.

Mae Helen wedi chwarae rôl allweddol yn y Rhwydwaith dros y pedair blynedd, gan ddechrau gyda Swyddog Cefnogi, gan symud i’w rôl bresennol fel Rheolwr Polisi a Phartneriaeth. Gyda thair blwyddyn ar ddeg o brofiad yn y maes Plismona yng Nghymru, mae hi’n dod â dealltwriaeth o weithio mewn partneriaeth, datblygu polisïau strategol ac ymgysylltiad gyda budd-ddeiliaid ledled awdurdodau lleol, Llywodraeth Cymru, gwasanaethau plismona, a sefydliadau cymunedol.

Mae gan Helen radd mewn Cymdeithaseg a Chriminoleg o Brifysgol Caerdydd ac mae hi wedi ymrwymo i sicrhau bod lleisiau partneriaid yn cael eu clywed ac yn cael eu hadlewyrchu mewn sgyrsiau cenedlaethol.

Mae Helen yn frwdfrydig am gefnogi twf a datblygiad y Rhwydwaith ac yn credu ym mhŵer cydweithio i greu cymunedau mwy diogel. Mae hi wedi bod yn rhan o amryw raglenni gwirfoddoli cymunedol, ac mae hi’n parhau i gefnogi ymgysylltiad cynhwysol, rhagweithiol. Mae ei ffordd o weithio wedi’i seilio mewn bod yn agored, gyda dyhead gwirioneddol i helpu eraill i gysylltu, a ffynnu o fewn y Rhwydwaith.

 

Ymunodd Sarah â’r Rhwydwaith yn 2024, o’r Asiantaeth Safonau Bwyd, ac mae hi’n cynnig profiad yn y maes cyfathrebu a rheoli digwyddiadau i’r swydd hon, gan gynnwys rheoli prosiectau rhaglenni gwobrau.

Mae Sarah yn rhoi ein cynulleidfa wrth galon ein gohebiaeth, gan sicrhau bod y Rhwydwaith yn torri drwy’r sŵn ac yn dweud wrth ymarferwyr beth sydd angen iddynt wybod i’w helpu i gadw cymunedau’n ddiogel yng Nghymru. Mae hi’n cynnal Gwobrau Cymunedau Mwy Diogel, sy’n dathlu rhagoriaeth a chefnogi arferion gorau yn y maes diogelwch cymunedol, yn ogystal â digwyddiadau personol a dros y we sy’n cael eu cynnal gan y Rhwydwaith. Mae hi’n gofalu am bresenoldeb digidol y Rhwydwaith, gan lunio adnoddau ar-lein a chymuned ar gyfer y sawl sy’n gweithio yn y maes cymunedau mwy diogel.

Mae gan Sarah brofiad o weithio yn y sector cyhoeddus a phreifat, a symudodd i’r maes cyfathrebu bedai blynedd yn ôl ar ôl gadael gyrfa yn y maes lletygarwch. Roedd hi’n rheoli bwytai o’r radd flaenaf yn y DU ac yn genedlaethol, gan gynnwys pedai blynedd fel rheolwr cyffredinol ar gyfer bwytai Jamie Oliver ym Mangkok. Roedd hi’n aelod gweithredol o’r bwrdd ar gyfer Siambr Fasnach Prydain yng Ngwlad Thai, ac ar ei dychweliad i’r DU, ymunodd â Siambr Fasnach De Cymru, gan arwain eu gohebiaeth a’u rhaglen ddigwyddiadau.

Cyhoeddiadau

Croeso i ‘Gwneud Cymru yn Fwy Diogel Gyda’n Gilydd’, cynllun strategol pum mlynedd Rhwydwaith Cymunedau Mwy Diogel Cymru. Ers 2021 mae’r Rhwydwaith wedi datblygu sylfaen gref a nod y cynllun hwn yw adeiladu ar ein llwyddiannau drwy barhau i gefnogi ymarferwyr a hybu cydweithio rhwng gweithwyr proffesiynol, partneriaid a buddddeiliaid.

Darllenwch y cynllun

Dyma adroddiad blynyddol cyntaf Rhwydwaith Cymunedau Mwy Diogel Cymru. Mae’n adroddiad byr sy’n ymdrin â rhwng Tachwedd 2020 a 31 Mawrth 2021 (dim ond ym mis Ionawr 2021 y dechreuodd y Tîm Rhwydwaith Cymunedau Mwy Diogel weithredu). Bydd adroddiadau blynyddol yn y dyfodol yn darparu gwybodaeth bellach, gan gynnwys trosolwg o’r flwyddyn gan gyd-Gadeiryddion Byrddau Cymunedau Mwy Diogel Cymru, sy’n darparu arweinyddiaeth i waith y Rhwydwaith.

I ddarllen yr adroddiad cliciwch yma