Diogelu ac Ymyrraeth Gynnar

Beth yw Diogelu ac Ymyrraeth Gynnar?

Dylai diogelu fod yn flaenoriaeth gyntaf i bawb sy’n gweithio gyda ac ochr yn ochr â phobl. Mae diogelu yn ymwneud ag amddiffyn pobl o bob ffurf o niwed a chamdriniaeth. Os yw gwasanaethau neu gymorth yn anniogel yna nid ydynt yn addas i’w diben. Felly mae’n flaenoriaeth i’r sector cyhoeddus, preifat a’r trydydd sector i ddarparu gwasanaethau a chymorth sy’n ddiogel a lle mae’r risgiau’n gyfyngedig neu’n cael eu rheoli.

Ym maes diogelu mae ymyrraeth gynnar yn ceisio mynd i’r afael â’r materion a godwyd pan leisiwyd pryder, er mwyn ymdrin â’r sefyllfa y mae unigolyn yn ei hwynebu drwy edrych ar wraidd y broblem. Mae’n ymwneud ag atal problem neu atal problem rhag datblygu ymhellach ar gyfer y dioddefwr. Y nod yw lleihau’r effaith hirdymor ar gyfer y dioddefwr a’u diogelu rhag camdriniaeth neu weithgarwch troseddol.

“Cymorth cynnar, a gaiff ei adnabod hefyd fel ymyrraeth gynnar, yw’r gefnogaeth a roddir i deulu pan mae problem yn ymddangos gyntaf.” NSPCC

Mae diogelu mewn deddfwriaeth yn ymwneud ag osgoi niwed a chamdriniaeth (gan gynnwys esgeulustod) sy’n canolbwyntio ar gam-drin plant a cham-drin oedolion (rydym wedi rhannu hyn yn gam-drin pobl hŷn a cham-drin oedolion mewn perygl).

Mae Adolygiadau Diogelu ac Adolygiadau Lladdiadau Domestig yn cynnwys dysgu o ddigwyddiadau, a’r nod yn aml yw gwella datgeliad cynnar ac ymyriadau i atal digwyddiadau tebyg yn y dyfodol.

Mae effaith Profiadau Niweidiol yn Ystod Plentyndod, a’r ymateb i’r rhai sydd wedi cael y profiadau hyn, yn faes sy’n ymwneud â gweithio’n wahanol ac mae darparu ymyriadau cynnar cyn y Profiadau Niweidiol yn Ystod Plentyndod yn cael effaith fwy ar y rhai sydd wedi eu profi. Tra’r ymdrinnir ag Atal Trosedd o dan bynciau eraill, mae’r Ymagwedd Iechyd y Cyhoedd yng Nghymru yn ceisio newid sut rydym yn atal trosedd a gall camau eraill, a allai fod yn ymyriadau cynnar, olygu fod materion yn cael eu rheoli cyn eu bod yn datblygu ymhellach. Atal Trais yw’r maes allweddol cyfredol lle caiff ymyrraeth gynnar ei datblygu gan ddefnyddio Ymagwedd Iechyd y Cyhoedd i geisio atal trais yn y dyfodol, p’un ai yw hynny’n drosedd â chyllyll, trais yn erbyn merched, cam-drin domestig a thrais rhywiol neu’n gam-fanteisio’n droseddol.

Mae ymyrraeth gynnar hefyd yn elfen allweddol ar gyfer Prevent a phroblemau eithafiaeth a radicaleiddio eraill. Fe all troseddau casineb ac ymddygiad gwrthgymdeithasol alluogi ychydig o adnabyddiaeth gynnar o droseddwyr y gellir eu cefnogi wedyn i newid eu hymddygiad.