Cam-drin Oedolyn mewn Perygl

Beth yw Cam-drin Oedolyn mewn Perygl?

Mae Cam-drin Oedolyn mewn Perygl yn un o’r dair elfen o dan ddiogelu. Fodd bynnag caiff Oedolyn mewn Perygl a Cham-drin Pobl Hŷn ei reoli ar y cyd o dan ddeddfwriaeth a Gweithdrefnau Diogelu Cymru.

Caiff oedolyn mewn perygl ei ddiffinio gan Ddeddf Gwasanaethau Cymdeithasol a Llesiant (Cymru) 2014 fel “oedolyn sy’n:

• profi, neu mewn perygl o brofi, camdriniaeth neu esgeulustod
• sydd ag anghenion o ran gofal a chymorth
• sydd o ganlyniad i’r anghenion hynny yn methu amddiffyn ei hun yn erbyn y gamdriniaeth neu’r esgeulustod neu’r perygl o hynny.”

Yn ôl Gweithdrefnau Diogelu Cymru:

“mae’r defnydd o’r term ‘mewn perygl’ yn golygu nad oes angen i gamdriniaeth neu esgeulustod go iawn ddigwydd cyn i ymarferwyr ymyrryd, yn hytrach dylai ymyriadau cynnar i amddiffyn oedolyn mewn perygl gael eu hystyried i atal camdriniaeth ac esgeulustod go iawn….”

…”.

Fe all camdriniaeth fod yn gorfforol, rhywiol, seicolegol, emosiynol, ariannol neu’n esgeulustod. Gall y gamdriniaeth ddigwydd mewn unrhyw leoliad, boed mewn annedd breifat, sefydliad neu unrhyw le arall. Gall nifer o’r rhain gael eu cysylltu â phynciau eraill yr ymdrinnir â hwy ar y wefan hon, gan gynnwys (ond nid yn gyfyngedig i) Trais yn Erbyn Merched, Cam-drin Domestig a Thrais Rhywiol, Caethwasiaeth Fodern a Chamfanteisio, a chamfanteisio’n droseddol.

Cyn Deddf Gwasanaethau Cymdeithasol a Llesiant (Cymru) 2014 roedd oedolion mewn perygl yn cael eu hadnabod fel oedolion diamddiffyn, term y cyfeirir ato yn aml o hyd o fewn y system cyfiawnder troseddol. Gall oedolyn gael ei nodi fel un sydd mewn perygl o ganlyniad i alluedd meddyliol (gan gynnwys dementia), iechyd a lles corfforol neu emosiynol, bod yn ofalwr di-dâl neu nodweddion eraill a ddiogelir.

Mae’n rhaid i’r dioddefwr fod yn 18 oed neu’n hŷn. Os ydynt o dan 18 oed yna daw’r gamdriniaeth o dan gategori cam-drin plant.